PERPERIKON - Bulgarske Machu Picchu
- Podrobnosti
- Kategorie: ZE SVĚTA
- Zveřejněno: 22. 8. 2015 12:24
Južno ot bulgarskogo univerzitnogo grada Stara Zagora v centru staroj Trakije i v vazhodnoj časti Rodopskih gor bliz grada Kărdžali leži mnogo interesna archeologična lokalita Perperikon. Jest to veliky komplex kamennih hramov i drugih budynkov postavenih na vysokoj skalě, že jest možno Perperikon nazyvati "Bulgarske Machu Picchu". (článek je napsaný v novoslověnštině)
Южно от булгарского универзитного града Стара Загора в центру старой Тракиɪе и в вазходной части Родопских гор близ града Кърджали лежи много интересна археологична локалита Перперикон. Іест то великы комплекс каменних храмов и других будынков поставених на высокой скалѣ, же ɪест можно Перперикон называти "Булгарске Мачу Пикчу".
Prvi ljudi na Perperikonu živěhu v vremeni neolita (mladějša kamenna era na koncu 5-ogo tysačalětija prěd Hristom). Archeologi dnes točno ne znajut, kto oni běhu, i nazyvajut jih "Civilizacija skalnih ljudij". Tuti ljudi na Perperikonu živěhu do vremen kretsko-mykenskoj civilizacije i takože iměhu s kretskoju civilizacijeju blizky kontakt, bo archeologi sut našli na Perperikonu različne artefakty s napisami v kretskoj abecedě s linearnim pisanijem typa A.
Първи люди на Перперикону живѣху в времени неолита (младѣйша каменна ера на концу 5-ого тысачалѣтиɪа прѣд Христом). Арxеологи днес точно не знают, кто они бѣху, и называют ɪих "Цивилизациɪа скалних людий". Тути люди на Перперикону живѣху до времен кретско-мыкенской цивилизациɪе и такоже имѣху с кретскою цивилизациɪею близкы контакт, бо арxеологи сут нашли на Перперикону различне артефакты с написами в кретской абецедѣ с линеарним писаниɪем тыпа А.
V antičnom vremeni Perperikon je byl široko znajemy kako trakijske svetište boga Dionisija. Kromě hrama tamo takože bylo orakulum i žreci, ktori prědpovědavali buduče. Tuto svetište je bylo svojim značenijem rovne s Delfskim orakulom. Stara legenda govori, že tamo byli mlady Alexander Veliky i mlady Octavianus Augustus, ktori oba dva darovali žertvy bogu Dionisiju i potom dostali ot žrecov prědpovědanije, že oni budut vladnuli velikim imperijam.
В античном времени Перперикон ɪе был широко знаɪемы како тракийске светище бога Дионисиɪа. Кромѣ храма тамо такоже было оракулум и жреци, ктори прѣдповѣдавали будуче. Туто светище ɪе было своɪим значениɪем ровне с Делфским оракулом. Стара легенда говори, же тамо были млады Александер Великы и млады Октавиɪанус Августус, ктори оба два даровали жертвы богу Дионисию и потом достали от жрецов прѣдповѣданиɪе, же они будут владнули великим империɪам.
V grečskom i rimskom vremeni Perperikon je byl monumentalny hramovy komplex boga Dionisija, ktory iměl takože svoje akropolis i krěpost, krypty i sarkofagy i druge budynky, jihže teritorijum je bylo bolše ot 10.000 kvadratnih metrov. Perperikon ot 5-ogo stolětija po Hristu je bylo hristijanske episkopske centrum, otkuda je prišlo hristijanstvo do rodopskoj oblasti, i ješte takože državne administrativne centrum imenovane "Archidos" za vsu trakijsku oblast izhodno-rimskogo (Byzantijskogo) imperija. Perperikon-Arhidos v tečeniji ot 8-ogo do 13-ogo stolětija je byl preměnlivo graničnoj vojenskoj krepostij Byzantije ili Bulgarskoj državy, čtože dodnes dokazuje ruina vojenskoj bašny (citadely) i mnogo drobnih archeologičnih artefaktov.
В гречском и римском времени Перперикон ɪе был монументалны храмовы комплекс бога Дионисиɪа, кторы имѣл такоже своɪе акрополис и крѣпост, крыпты и саркофагы и друге будынкы, ɪихже териториюм ɪе было болше от 10.000 квадратних метров. Перперикон от 5-ого столѣтиɪа по Христу ɪе было христиɪанске епископске центрум, откуда ɪе пришло христиɪанство до родопской области, и ɪеште такоже държавне административне центрум именоване "Арxидос" за всу тракийску област изходно-римского (Византийского) империɪа. Перперикон-Архидос в течениɪи от 8-ого до 13-ого столѣтиɪа ɪе был премѣнливо граничной воɪенской крепостий Византиɪе или Булгарской държавы, чтоже доднес доказуɪе руина воɪенской башны (цитаделы) и много дробних арxеологичних артефактов.
Sedm tysača lět istorije Perperikona bylo ukončeno v 14-om stolětiji ot islamsko-osmanskoj expanzije do Evropy. Osmanska armada je dobyla komplex, razvalila jego i sožegla. Nasěljenije okolo skaly bylo takože mnogo prěměnjeno. Slověni sut otišli i do prazdnogo prostora prišlo nove islamske nasěljenije, ktore slavnu tradiciju neznalo i drželo toliko prostu legendu o pustom skalnom gradu nazyvanim kako "Vrh džinov".
Седм тысача лѣт историɪе Перперикона было укончено в 14-ом столѣтиɪи от исламско-османской експанзиɪе до Европы. Османска армада ɪе добыла комплекс, развалила ɪего и сожегла. Насѣльениɪе около скалы было такоже много прѣмѣньено. Словѣни сут отишли и до праздного простора пришло нове исламске насѣльениɪе, кторе славну традицию незнало и държело толико просту легенду о пустом скалном граду называним како "Върх джинов".
Perperikon je byl izničeny, pusty i neznajemy do nedavnogo lěta 2002, kogda na skalě byli početi archeologični razkopanija financirani ot Europskoj Unije i UNESCO i inspirovani starimi dokumentami grečskih i rimskih istorikov (najmě Herodota) o existenciji velikogo skalnogo hrama boga Dionisija severno ot Greciji v Rodopskih gorah. Archeologični razslědovanija dodnes ne končajut, i jest možne, že v budučem vremeni ješte budeme o Perperikonu slyšeti mnogo interesnogo.
Перперикон ɪе был изничены, пусты и незнаɪемы до недавного лѣта 2002, на скалѣ когда были почети арxеологични разкопаниɪа финанцирани от Европского Совеза и UNESCO и инспировани старими документами гречских и римских историков (наймѣ Херодота) о ексистенциɪи великого скалного храма бога Дионисиɪа северно от Грециɪи в Родопских горах. Археологични разслѣдованиɪа доднес не кончают, и ɪест можне, же в будучем времени ɪеште будеме о Перперикону слышети много интересного.
